Malaking tulong sa mga mag-aaral at kanilang magulang ang pagtaas sa 50% ng discount ng mga estudyante sa MRT-3, LRT-1, at LRT-2 na sinimulan ngayong araw.
Ayon kay Transportation Secretary Vince Dizon, ang dagdag diskuwento ay tugon ng Department of Transportation (DOTr), kasama ng MRT-3, Light Rail Transit Administration (LRTA) at Light Rail Manila Corporation (LRMC), sa utos ni Pangulong Ferdinand Marcos Jr. na tulungang mapababa ang gastusin ng mga estudyante ngayong pasukan.
“Ang directive ng Pangulo, magdagdag tayo mg discount sa LRT-1, LRT-2, at MRT-3. ‘Yung dating 20% discount lang sa mga estudyante, inutos ng Pangulo na gawin nating 50% ang discount ng mga estudyante,” pahayag ni Secretary Dizon kasabay ng paglunsad ng programa sa LRT-2 Antipolo Station.
“Malaking tulong ito sa mga pamilya lalo na sa mga magulang na hirap magpa aral sa kanilang mga anak. ‘Yung matitipid nila, pwede nilang ilaan sa ibang gastusin gaya ng mga project, dagdag nila sa baon, o sa iba pang mga gastusin sa school,” ani Secretary Dizon.
Maraming estudyante ang makikinabang sa diskwentong hatid ng pamahalaan lalo na sa LRT-2 line na nagseserbisyo sa mga estudyanteng nag-aaral sa University Belt Area sa Maynila.
“Mabuti na ito at least diretso sa bulsa ng mga estudyante at ng pamilya nila “yung benepisyo, diretsong tulong ito,” paliwanag ng transport chief.
Ang 50% discount sa mga tren na epektibo araw-araw pati weekend at holiday ay tatagal hanggang 2028, at bukas para sa lahat ng estudyante, kabilang ang mga kumukuha ng post graduate studies.
Watch the videos in the links below:
1. Click here.
2. Click here.
3. Click here.
